ශ්‍රී ලංකා රේගුව යුගයට ගැළපෙන ආයතනික ව්‍යුහයකට යාත්‍රා කරන බව ජනාධිපති අනුර කුමාර දිසානායක මහතා පවසයි.
ජනාධිපතිවරයා මේ බව සඳහන් කළේ අද (05) ජනාධිපති ලේකම් කාර්යාලයේදී ශ්‍රී ලංකා රේගු උසස් නිලධාරීන් සමඟ 2025 අයවැය සහ ආයතන ප්‍රතිව්‍යුහගතකරණය පිළිබඳව පැවති සාකච්ඡාවේදීය.
- රේගු දෙපාර්තමේන්තුවේ අකාර්යක්ෂමතා, වංචා දූෂණ සහ ජනතා අප්‍රසාදය අවම කිරීම සඳහා කටයුතු කිරීම මූලික කරුණක් වී තිබේ.
- නව තාක්ෂණය සමඟ සේවා කාර්යක්ෂමතාව වැඩි කිරීම සහ මෙහෙයුම් වේගවත් කිරීම සඳහා අවධානය යොමු කර ඇත.
- අක්‍රමිකතා අවම කිරීම සඳහා දැඩි නීති සම්පාදනය කිරීම පිළිබඳවද ජනාධිපතිවරයා උපදෙස් ලබා දුන්නේය.
- මානව සම්පත් කළමනාකරණය, නව බඳවා ගැනීම් සහ යටිතල පහසුකම් සංවර්ධනය කඩිනම් කිරීම සඳහාද රේගු නිලධාරීන්ගේ අවධානය යොමු කර ඇත.
පසුගිය වසරේ රේගුව විසින් ඉටු කළ ආදායම් ඉලක්ක ජනාධිපතිවරයාගේ ඇගයීමට ලක් වූ අතර, මෙවර ඉලක්කය සපුරාලීම සඳහා ගත යුතු ක්‍රියාමාර්ග සම්බන්ධයෙන්ද සාකච්ඡා සිදු කළේය.